ఈతరం భారతం ఓవర్సీస్ న్యూస్ మార్చ్ 18:
పశ్చిమాసియాలో ఉద్రిక్తతలు మరోసారి పరాకాష్టకు చేరుకున్నాయి. తన దేశంలోని కీలక ఇంధన మౌలిక సదుపాయాలపై జరిగిన దాడులకు ప్రతిగా ఇరాన్ పొరుగున ఉన్న గల్ఫ్ దేశాలకు భీకర హెచ్చరికలు జారీ చేసింది. సౌదీ అరేబియా, ఖతార్, యూఏఈ దేశాల్లోని చమురు, గ్యాస్ క్షేత్రాలే లక్ష్యంగా మరికొన్ని గంటల్లోనే దాడులు చేయబోతున్నట్లు ఇరాన్ ప్రకటించడం ప్రపంచవ్యాప్తంగా కలకలం రేపుతోంది.తమపై జరిగిన దాడికి ప్రతీకారం తీర్చుకుంటామని చెబుతూ, ఇరాన్ తన పొరుగు దేశాలైన సౌదీ అరేబియా, ఖతార్ మరియు యూఏఈలను హెచ్చరించింది. ఆయా దేశాల్లోని చమురు బావులు, గ్యాస్ నెట్వర్క్లపై మరికొద్ది గంటల్లోనే దాడులు చేస్తామని ఇరాన్ సైనిక వర్గాలు హెచ్చరించాయి.ఒకవేళ ఇరాన్ అన్నంత పని చేస్తే, ప్రపంచవ్యాప్తంగా చమురు ధరలు ఒక్కసారిగా ఆకాశాన్ని తాకే ప్రమాదం ఉంది. ఇప్పటికే అంతర్జాతీయ మార్కెట్లో క్రూడాయిల్ ధరలు పెరగడం ప్రారంభమయ్యాయి.ఇరాన్ హెచ్చరికల నేపథ్యంలో అమెరికా తన మిత్రదేశాల రక్షణకు సిద్ధమైంది. గల్ఫ్ దేశాల్లోని అమెరికా సైనిక స్థావరాలు హై అలర్ట్లోకి వెళ్లాయి. అటు ఇజ్రాయెల్ కూడా ఇరాన్ నుండి ఎదురయ్యే ఎలాంటి క్షిపణి దాడులనైనా తిప్పికొట్టేందుకు సిద్ధంగా ఉన్నట్లు ప్రకటించింది. ఈ పరిణామాలు మూడవ ప్రపంచ యుద్ధానికి దారితీస్తాయేమోనన్న ఆందోళనలు వ్యక్తమవుతున్నాయి.
