ఈతరంభరతం హైదరాబాద్ మార్చి 30
తెలంగాణ శాసనసభ ఒక చారిత్రాత్మక నిర్ణయం తీసుకుంది. రాష్ట్రంలో రైతులు, వ్యవసాయ కూలీల ప్రాణాలకు ముప్పుగా మారిన ‘పారాక్వాట్ డైక్లోరైడ్’ పురుగుల మందును తక్షణమే నిషేధించాలని కోరుతూ సభ ఏకగ్రీవంగా తీర్మానం ఆమోదించింది. వ్యవసాయంలో కలుపు నివారణకు విరివిగా వాడే ‘పారాక్వాట్ డైక్లోరైడ్’ అత్యంత విషపూరితమైనదని శాసనసభలో ప్రవేశపెట్టిన తీర్మానం స్పష్టం చేసింది. ఈ రసాయనం వల్ల రాష్ట్రంలో ఏటా సుమారు 2,000 మంది రైతులు, రైతు కూలీలు ప్రాణాలు కోల్పోతున్నారని వ్యవసాయ శాఖ మంత్రి తుమ్మల నాగేశ్వరరావు ఆవేదన వ్యక్తం చేశారు. పొరపాటున గానీ లేదా క్షణికావేశంలో గానీ ఈ మందును తీసుకుంటే మనిషి ఊపిరితిత్తులు, ఇతర అంతర్గత అవయవాలు పూర్తిగా దెబ్బతింటాయి. దీనికి ఇప్పటి వరకు ఎలాంటి విరుగుడు లేకపోవడం వల్ల మరణాల రేటు 98% గా ఉందని నిపుణులు హెచ్చరిస్తున్నారు. ఇప్పటికే ప్రపంచవ్యాప్తంగా సుమారు 70 దేశాలు దీనిని నిషేధించగా, తెలంగాణ ప్రభుత్వం కూడా అదే బాటలో పయనిస్తోంది.
మందు నిషేధానికి సంబంధించి ఇటీవల సామాజిక మాధ్యమాల్లో పెద్ద ఎత్తున చర్చ జరిగింది. ముఖ్యంగా ప్రముఖ నటుడు రాహుల్ రామకృష్ణ తన సోదరుడు పారాక్వాట్ విషప్రయోగం వల్ల మరణించారని తెలుపుతూ, ఈ మందును వెంటనే నిషేధించాలని ముఖ్యమంత్రి రేవంత్ రెడ్డికి మరియు ప్రధాని మోదీకి విజ్ఞప్తి చేశారు. దీనితో పాటు వరంగల్ ఎంపీ కడియం కావ్య కూడా లోక్సభలో ఈ అంశాన్ని లేవనెత్తి కేంద్రంపై ఒత్తిడి తెచ్చారు. కేవలం ఆత్మహత్యలకే కాకుండా, రక్షణ కవచాలు లేకుండా ఈ మందును పొలాల్లో పిచికారీ చేయడం వల్ల కూడా రైతులు శ్వాసకోశ ఇబ్బందులు, చర్మ వ్యాధుల బారిన పడుతున్నారని ప్రభుత్వం గుర్తించింది.రాష్ట్ర శాసనసభ ఆమోదించిన ఈ తీర్మానం ద్వారా పారాక్వాట్ తయారీ, దిగుమతి, నిల్వ, రవాణా మరియు విక్రయాలపై సంపూర్ణ నిషేధం విధించాలని కేంద్ర ప్రభుత్వాన్ని కోరారు. ఒడిశా, కేరళ వంటి రాష్ట్రాలు ఇప్పటికే తాత్కాలిక నిషేధాన్ని అమలు చేస్తున్నాయని, కేంద్రం తుది నిర్ణయం తీసుకునే వరకు రాష్ట్ర ప్రభుత్వం కూడా కఠినమైన నిబంధనలు అమలు చేయాలని సభ్యులు సూచించారు. ఆన్లైన్లో సైతం ఈ మందు లభ్యత లేకుండా చూడాలని, ఉల్లంఘించిన వారిపై కఠిన చర్యలు తీసుకోవాలని ప్రభుత్వం నిర్ణయించింది. సుస్థిర సేంద్రియ వ్యవసాయాన్ని ప్రోత్సహించే క్రమంలో ఇటువంటి ప్రమాదకర రసాయనాలను దూరం చేయడం అత్యవసరమని మంత్రి తుమ్మల పేర్కొన్నారు.
