ఈతరం భారతం హైదరాబాద్ ఆగస్ట్ 3
హైదరాబాద్లోని నిజాం ఇన్స్టిట్యూట్ ఆఫ్ మెడికల్ సైన్సెస్ (నిమ్స్) మూడేళ్లలోపు 1,000 రోబోటిక్ సహాయక శస్త్రచికిత్సలు విజయవంతంగా పూర్తి చేసి కీలక మైలురాయిని చేరుకుంది.మొత్తం శస్త్రచికిత్సల్లో యూరాలజీ విభాగం 590, సర్జికల్ గ్యాస్ట్రోఎంటరాలజీ 248, సర్జికల్ ఆంకాలజీ 162 శస్త్రచికిత్సలు నిర్వహించింది. క్యాన్సర్, కిడ్నీ మార్పిడి, క్లిష్ట పునర్నిర్మాణ శస్త్రచికిత్సలు కూడా ఇందులో ఉన్నాయి. ఈ 1,000 రోబోటిక్ శస్త్రచికిత్సల్లో 90 శాతానికి పైగా ఆరోగ్యశ్రీ, ముఖ్యమంత్రి సహాయ నిధి (CMRF) వంటి ప్రభుత్వ పథకాల ద్వారా పూర్తిగా ఉచితంగా నిర్వహించడం విశేషం. ఈ ఘనతపై నిమ్స్ డైరెక్టర్ డా. రాహుల్ దేవరాజ్ వైద్య బృందాలను అభినందించారు. రాష్ట్ర ఆరోగ్య మంత్రి దామోదర రాజనరసింహ, ముఖ్యమంత్రి రేవంత్ రెడ్డి అందించిన మార్గదర్శకం, సహకారంతోనే ఈ మైలురాయి సాధ్యమైందని తెలిపారు.
