ఈ తరం భారతం ఏప్రిల్ 1
తెలంగాణ రాష్ట్రంలోని నిరుపేదల సొంతింటి కల నెరవేరుతోంది. రాష్ట్ర ప్రభుత్వం ప్రతిష్టాత్మకంగా అమలు చేస్తున్న ‘ఇందిరమ్మ ఇళ్ల పథకం’లో భాగంగా ఏప్రిల్, మే, జూన్ నెలల్లో ఏకంగా లక్ష మంది లబ్ధిదారులు తమ నూతన గృహాల్లోకి అడుగుపెట్టబోతున్నారు. ఇందుకోసం గృహనిర్మాణ శాఖ పకడ్బందీగా ఏర్పాట్లు చేయడమే కాకుండా, సామూహిక గృహ ప్రవేశాల కోసం శుభ ముహూర్తాలను కూడా ఖరారు చేసింది.ఈబృహత్తర కార్యక్రమం నేడు (ఏప్రిల్ 1, 2026) ఘనంగా ప్రారంభమైంది. తొలిరోజే రాష్ట్రవ్యాప్తంగా సుమారు 4,100 మంది లబ్ధిదారులు తమ ఇళ్లలోకి ప్రవేశించారు. ఈ నెల చివరి నాటికి మొత్తం 33 వేల మంది గృహ ప్రవేశాలు పూర్తి చేయాలని ప్రభుత్వం లక్ష్యంగా పెట్టుకుంది. మిగిలిన ఇళ్లను మే మరియు జూన్ మొదటి వారంలో పూర్తి చేయనున్నారు.
ముహూర్తాల ఖరారు: ఏ తేదీల్లో గృహ ప్రవేశాలంటే?
లబ్ధిదారుల సెంటిమెంట్ను గౌరవిస్తూ, గృహనిర్మాణ శాఖ మంచి రోజులను ఎంపిక చేసి తేదీలను ప్రకటించింది:
ఏప్రిల్ నెల: 1, 20, 21, 30 తేదీలు.
మే నెల: 4, 8, 13, 14, 18, 25, 27, 28 తేదీలు.
జూన్ నెల: జూన్ మొదటి వారంలో గృహ ప్రవేశాలకు అవకాశం కల్పించారు.
ఈ మూడు నెలల వ్యవధిలో లక్ష ఇళ్ల నిర్మాణాలను పూర్తి చేసి, పేదలకు అందజేయడం ద్వారా ప్రభుత్వం తన చిత్తశుద్ధిని చాటుకుంటోంది. లబ్ధిదారులకు అవసరమైన మౌలిక సదుపాయాల కల్పనపై అధికారులు ప్రత్యేక దృష్టి సారించారు.
