ఈతరం భారతం హైదరాబాద్ మార్చ్ 26
భాగ్యనగరంలో రేపు నిర్వహించనున్న “శ్రీరామనవమి శోభాయాత్ర” సందర్భంగా నగర ట్రాఫిక్ పోలీస్ విభాగం కీలక ప్రకటన విడుదల చేసింది. రేపు ఉదయం 9 గంటల నుండి రాత్రి 9 గంటల వరకు యాత్ర సాగే మార్గాల్లో ట్రాఫిక్ ఆంక్షలు అమలులో ఉంటాయని వెల్లడించింది. సీతారాంబాగ్ ఆలయం నుండి ప్రారంభమై సుల్తాన్ బజార్లోని హనుమాన్ వ్యాయామశాల వరకు సాగే ఈ భారీ శోభాయాత్ర వల్ల పాతబస్తీ మరియు సెంట్రల్ హైదరాబాద్లోని పలు ప్రధాన రహదారులు మూసివేయబడతాయి. ప్రయాణికులు ఇబ్బంది పడకుండా ఉండేందుకు దాదాపు 24 ప్రధాన జంక్షన్ల వద్ద మళ్లింపు పాయింట్లను ఏర్పాటు చేశారు.శోభాయాత్ర ప్రారంభమయ్యే సీతారాంబాగ్ ప్రాంతం నుండి సుల్తాన్ బజార్ వరకు ఉన్న మార్గాల్లో వాహనాల రాకపోకలను నియంత్రించనున్నారు. ముఖ్యంగా ఆసిఫ్ నగర్ నుండి వచ్చే వాహనాలను మల్లేపల్లి వద్ద, దారుసలాం నుండి వచ్చే ట్రాఫిక్ను అఘాపురా వద్ద మళ్లిస్తారు. అలాగే, ఎంజే మార్కెట్ , అబిడ్స్ జిపిఓ , అఫ్జల్గంజ్ మరియు కోఠి ఆంధ్ర బ్యాంక్ వంటి అత్యంత రద్దీ ప్రాంతాల్లో వాహనాల రాకను పూర్తిగా నిలిపివేసి, ప్రత్యామ్నాయ మార్గాలైన నాంపల్లి, మెహదీపట్నం, చాదర్ఘాట్ వైపు మళ్లిస్తారు. యాత్ర ముందుకు సాగుతున్న కొద్దీ ఆయా ప్రాంతాల్లో మళ్లింపులను విడతల వారీగా ఎత్తివేస్తామని పోలీసులు స్పష్టం చేశారు.బేగంబజార్ ఛత్రీ, పుట్లిబౌలి ఎక్స్ రోడ్స్, కాచిగూడ మరియు నింబోలిఅడ్డ వంటి ప్రాంతాల్లో రేపు భారీ రద్దీ ఉండే అవకాశం ఉంది. అత్యవసర పనులపై బయటకు వచ్చే వారు గూగుల్ మ్యాప్స్ లేదా ట్రాఫిక్ పోలీసుల సోషల్ మీడియా పేజీలను గమనించి తమ ప్రయాణాన్ని ప్లాన్ చేసుకోవాలని అధికారులు సూచించారు. అత్యవసర సహాయం కోసం ట్రాఫిక్ హెల్ప్లైన్ నంబర్ 9010203626 అందుబాటులో ఉంటుందని తెలిపారు. శోభాయాత్ర సజావుగా సాగేందుకు మరియు సామాన్య ప్రజలకు ఇబ్బంది కలగకుండా ఉండేందుకు వాహనదారులందరూ పోలీసులకు సహకరించాలని హైదరాబాద్ సిటీ పోలీస్ కోరింది.
