ఈతరం భారతం హైదరాబాద్ జూన్ 8
తెలంగాణలోని పాఠశాల విద్యార్థులకు విద్యాశాఖ కీలక అప్డేట్ ఇచ్చింది. రాష్ట్రంలోని అన్ని ప్రభుత్వ, ప్రైవేటు పాఠశాలలకు సంబంధించి 2026-27 విద్యా సంవత్సరపు వార్షిక అకడమిక్ క్యాలెండర్ను పాఠశాల విద్యాశాఖ అధికారికంగా విడుదల చేసింది.రాబోయే విద్యా సంవత్సరంలో విద్యార్థులకు నాణ్యమైన విద్యను అందించడంతో పాటు, సిలబస్ పూర్తి చేయడానికి వీలుగా మొత్తం 227 పనిదినాలను విద్యాశాఖ ఖరారు చేసింది.ఈ కొత్త క్యాలెండర్ ప్రకారం తెలంగాణలో ఎంతో వైభవంగా జరుపుకునే దసరా పండుగకు ఈసారి భారీగానే సెలవులు దక్కాయి. అక్టోబర్ 10, 2026 నుండి అక్టోబర్ 22, 2026 వరకు మొత్తం 13 రోజుల పాటు దసరా సెలవులను ప్రకటించారు. అలాగే సంక్రాంతి పండుగ పురస్కరించుకుని జనవరి 13, 2027 నుండి జనవరి 17, 2027 వరకు మొత్తం 5 రోజుల పాటు పాఠశాలలకు సెలవులు ఉంటాయి. ఈ విద్యా సంవత్సరానికి గానూ ఏప్రిల్ 23, 2027ను చివరి పనిదినంగా విద్యాశాఖ నిర్ణయించింది. ఆ తర్వాత ఏప్రిల్ 24, 2027 నుండి జూన్ 13, 2027 వరకు విద్యార్థులకు వేసవి సెలవులు ఉంటాయి. తిరిగి జూన్ 14, 2027న పాఠశాలలు పునఃప్రారంభమవుతాయి.పాఠశాల విద్యాశాఖ నిబంధనల ప్రకారం ఉచిత మరియు నిర్బంధ విద్యా హక్కు చట్టం మార్గదర్శకాలకు అనుగుణంగా ప్రాథమిక, ఉన్నత పాఠశాలల్లో నిర్దేశిత పనిదినాలు ఉండేలా ఈ క్యాలెండర్ను రూపొందించారు. నిర్ణీత సమయంలోగా సిలబస్ను పూర్తి చేయాలని, ఉపాధ్యాయులు ప్రణాళికాబద్ధంగా అకాడమిక్ ప్లాన్ను అమలు చేయాలని విద్యాశాఖ ఆదేశించింది. ముఖ్యంగా అక్టోబర్లో వచ్చే దసరా సెలవులను, జనవరిలో వచ్చే సంక్రాంతి సెలవులను విద్యార్థులు, ఉపాధ్యాయులు తమ ప్రయాణ ప్రణాళికల కోసం ముందుగానే ప్లాన్ చేసుకునేలా ఈసారి ముందే స్పష్టతనిచ్చారు. ప్రైవేట్ పాఠశాలలు కూడా విద్యాశాఖ ప్రకటించిన ఈ అధికారిక క్యాలెండర్ను తప్పనిసరిగా పాటించాలని, నిబంధనలు ఉల్లంఘిస్తే కఠిన చర్యలు ఉంటాయని అధికారులు హెచ్చరించారు. పరీక్షల పూర్తి వివరణాత్మక షెడ్యూల్ త్వరలోనే జిల్లాల వారీగా పాఠశాలలకు చేరనుంది.
